Utunzaji wa ngozi ya mwili, mambo muhimu ya kufahamu

Fahamu ya kwamba ngozi bora haiokei kwa siku moja. Ngozi bora inahitaji jitihada kubwa hasa katika kubadili na kujitoa sadaka kwa baadhi ya mitindo ya maisha.

Hata kama utafanikiwa kufuata taratibu za utunzaji bora wa ngozi, fahamu kwamba si kila siku ngozi yako itakuwa na muonekano bora.

Kuna mambo ambayo kwa wakati fulani yanaweza kusababisha muonekano wa ngozi yako kubadilika bila kujali ni kwa kiwango gani unaitunza ngozi yako.

Katika nyakati hizi ni vizuri kujitathmini ni kujua ni nini kimepelekea mabadiliko ya ghafla kuliko kuanza kutumia vipodozi.

Baadhi ya mambo ambayo yanaweza kusababisha mabadiliko ya ghafla ya muonekano wa ngozi yako ni pamoja na;

• Mabadiliko ya homoni, hasa wakati wa hedhi kwa wanawake.
• Msongo wa mawazo
• Kukosa usingizi wa kutosha
• Vilevile unapaswa kufahamu ya kuwa ngozi huzeeka, na kadri inavyozeeka ndivyo inapoteza ubora.

Huwezi kuzuia jambo hili lakini kuna mambo kadhaa ambayo ukiyafuata unaweza kusaidia ngozi yako Kupoteza ubora wake kwa kasi ndogo na kukufanya kuonekana mwenye ngozi bora bila kujali umri wako.

Imezoeleka kuwa ngozi huwa na muonekano bora na wa kuvutia zaidi kwa watu wenye umri wa kati ya miaka 20 hadi 30.

Lakini ukweli ni kwamba katika umri wowote unaweza kuwa na ngozi bora na ya kuvutia iwapo utafuata miongozo bora ya namna nzuri ya kutunza ngozi yako.

Umuhimu wa ngozi mwilini

Ngozi ni ogani iliyofunika maeneo yote ya mwili wako ambayo kwa sehemu kubwa imeundwa na seli zilizokufa.

Ngozi ndio ogani kubwa zaidi katika mwili wako kuliko ogani nyingine yoyote.

Katika mwili wako ngozi ina kazi kuu zifuatazo:

• Inalinda sehemu za ndani za mwili kama vile mishipa ya damu, nyama na mifupa.
• Inasaidia kurekebisha jotoridi la mwili.
• Ngozi ni kinga ya awali dhidi ya vimelea vinavyoingia na kuathiri sehemu za ndani za mwili.
• Mwili husaidia utoajitaka mwili kupitia mfumo wa jasho.
• Husaidia kufyonza na kupunguza athari za mwanga wa jua ambao ni hatari kwa afya.
• Ngozi hufanya kazi sambamba na mwanga wa jua wa alfajiri kutengeneza virutubisho vya Vitamini D. ambavyo ni muhimu kwa afya ya meno, ngozi na mifupa.
• Ngozi huzalisha dutu muhimu za rangi za melanini ambao husaidia kulinda ngozi dhidi ya mionzi hatari.

Ili kuleta ufanisi na kuzuia kuichosha ngozi, una wajibu wa kuisaidia ngozi katika baadhi ya kazi zake.

Pamoja na kwamba ngozi hupata chakula kupitia damu ambayo hufika katika ngozi kupitia mtandao wa mishipa ya damu, chakula ni moja ya msaada mkubwa ambao ngozi inahitaji kutoka kwako.

Kutokufanya hivyo kunaichosha ngozi kwa haraka na kuisababisha kuzidiwa na kuizeeka mapema.

Sayansi ya ngozi na Matabaka ya ngozi.

Tabaka la nje.

Hili ni tabaka la nje kabisa la ngozi ambalo linaonekana. Tabaka hili lina upana wa kati ya milimita 0.5 had 1 na limeundwa na seli za aina tatu ambazo ni

Keratinocytes, seli hizi husaidia kutengenezwa seli za ngozi zilizoharibiwa,

Melanocytes, seli hizi husaidia kutengenezwa rangi ya ngozi, kwa asili rangi inayotengenezwa na seli hizi ni nyeusi, na muonekano wa rangi nyeusi wa mtu hutegemea na kiwango cha rangi kilichotengenezwa na seli hizi

Langerhans cells, seli hizi husaidia kuimarisha kinga maeneo ya ngozi kwa kutambua hisia na migusu ambayo ianakuja karibu na ngozi.

Tabaka la nje limegawanyika katika matabaka makuu 6 ambayo ni;

01: Stratum disjunctum sehemu ya juu kabisa ya tabaka la nje.

Tabaka hili limeundwa na seli zilizokufa, mafuta na protini muhimu ya keratini. Seli hizi mfu hupukutika kila baada ya mwezi mmoja na kupelekea ngozi kutengeneza seli nyingine mpya.

Kupukutika au kujimenya kwa seli hizi ni kitendo cha kibaolojia cha kiautomatiki lakini pia kitendo hiki kinaweza kuharakishwa na matumizi ya vipodozi yanayomenya ngozi.

Mfano matumizi ya Scrub huharakisha hatua hii.

02: Sehemu ya pili ya tabaka la nje kwenda chini ni stratum corneum.

Katika tabaka hili ni seli hai ambazo zinaelekea kufa kwa ajili ya kutengeneza tabaka la juu. Katika tabaka hili hakuna maji ingawa maji yanaweza kufika kutoka juu ya ngozi kupitia kuoga au vipodozi.

Tabaka hili limeundwa na mafuta kwa kiasi kikubwa.

Seli katika tabaka hili imeshonana kwa kiasi kikubwa kiasi kwamba ikiwa zitapata jeraha basi sehemu kubwa ya seli huathiriwa.

03: Inayofuatia ni sehemu ya tatu ya tabaka la nje ambayo huitwa nistratum lucidum.

Tabaka hili linapatikana katika ngozi za mikono na nyayo za miguu. Katika tabaka hili kuna kiwango kikubwa cha dutu za filamenti ambazo huongeza uimara wa ngozi katika maeneo haya.

04: Sehemu ya nne ni stratum granulosum.

Katika tabaka hili kuna kiwango kikubwa cha dutu muhimu inazosaidia ngozi kuwa nyororo na mbichi muda wote.

05: Sehemu ya tano ya tabaka la nje ni ni stratum spinosum.

Ni katika tabaka hili ambapo seli za Langerhans zinapatikana kwa wingi. Seli hizi husaidia kutoa ulinzi na kinga mbalimbali za maradhi dhidi ya ngozi.

Ni katika tabaka hili ambapo saratani nyingi za ngozi huanzia ikiwa litapata hitilafu.

06: Na sehemu ya sita ya tabaka la nje ni stratum germinativum.

Hili ni tabaka la chini kabisa la tabaka la juu la ngozi ambalo ndiko safari ya utengenezwaji wa seli na dutu zote zinazounda ngozi huanzia.

Seli za keratini na Melanini zote hupatikana katika tabaka hili. Hitilafu katika sehemu hii inaweza kupelekea kupata matatizo ya saratani kwa urahisi.

Tabaka la kati la Ngozi .

Hili ni tabaka chini ya tabaka la juu (epidemisi) la ngozi. Tabaka hili ndio hudhibiti na kurekebisha muundo wa ngozi kwa ujumla.

Tabaka hili limeundwa na vitu vifuatavyo:

• Tezi za jasho.
• Mishipa ya damu.
• Tezi za ute wa sebamu.
• Mashina ya vinyweleo.
• Mfumo wa limfu (mfumo wa ukusanyaji maji na vimiminika mbalimbali vya mwili).
• Protini za colajeni na elastini ambazo husaidia muundo na muonekano wa ngozi usipoteze asili yake.

Katika tabaka hili jasho, ute wa sebamu na tindikali za uric hutengenezwa na kutolewa nje kupitia milija maalumu ya jasho.

Mchanganyiko wa takamwili hizi una hali ya tindikali ambayo inatoa faida ya ulinzi dhidi ya vimelea vinavyoathiri ngozi.

Tabaka la ndani la ngozi.

Hili hupatikana chini kabisa baada ya tabaka la juu na la kati. Tabaka hili limeundwa na; 

Tishu hizi hufanya kazi ya kurekebisha joto la ngozi na mwili na kufyonza mitikisiko na mitetemo ya ngozi ambayo inaweza kusababisha ngozi kuharibika.

Tishu hizi za mafuta zimeshikiliwa na tishu za misuli iliyofunika mifupa. Hakuna vipodozi vinavyoweza kuathiri tabaka hili kwa urahisi.

Tabaka hili hupoteza uwezo wake kadri umri unavyoongezeka hivyo kuiacha ngozi ikiwa na msaada hafifu wa kujishikiza hivyo kuifanya ngozi kupoteza umbo na mwonekano wake.

Hali hii husababishwa kutokea kwa makunyanzi kadri unavyoongezeka umri.

Urembo wa ngozi ni zaidi ya kile unachopaka moja kwa moja juu ya ngozi. Chakula na jinsi unavyoishi vinaathiri kwa kiasi kikubwa ngozi yako.

Vipodozi vinavyomenya ngozi huweza kukusaidia kutengenezwa kwa seli mpya za ngozi hivyo kuimarisha muonekano wako. Mfano scrub.

Tezi za sebamu

Tezi za sebamu huzalisha ute ambao husaidia kulainisha ngozi. Ute huu haupaswi kuzidi au kupungua.

Kiwango cha ute kwa sehemu kubwa huathiri ubora wa ngozi kutokana na watu kushindwa kujua ni aina gani ya kipodozi atumie kulingana na kiwango cha ute katika ngozi yake.

Protini za colajeni na elastini

Protini za colajeni na elastini husaidia kuimarisha muonekano na umbao wa ngozi. Kupungua kwa protini hii kwa sehemu kubwa kunasababishwa na umri kuongezeka.

Vitamini C

Vitamini C ambayo hupatikana kwa wingi katika ngozi husaidia kutengenezwa kwa protini hii hivyo matumizi vya matunda kwa wingi huchelewesha uzee.

Hitimisho.

Ngozi bora na yenye afya ni jukumu lako wewe mwenyewe. Una wajibu wa kujifunza na kujua njia mbalimbali za kusaidia kutunza ngozi yako.

Katika kufanikisha hili elimu juu ya aina ya ngozi, vyakula bora kwa ajili ya ngozi, muundo wa ngozi na jinsi ngozi inafanya kazi ni muhimu zaidi katika kukusaidia kuchagua njia sahihi na bora ya kutunza ngozi yako.