Dalili za UKIMWI, Tiba na aina ya vipimo vya UKIMWI

UKIMWI, Upungufu wa Kinga MWIlini, ni ugonjwa wa zinaa unaosababishwa na virusi aina ya HIV. Ni miongoni mwa magonjwa makubwa ya kihistoria ulimwenguni kutokana na kusababisha idadi kubwa ya vifo tangu kugunduliwa kwa ugonjwa huu.

Kuna uzushi na nadharia mbalimbali kuhusu asili ya ugonjwa huu wa UKIMWI. Katika makala hii tumekuandalia dondoo muhimu kuhusu ugonjwa huu, dondoo zitakazojibu maswali yako yote kuhusu ugonjwa huu wa UKIMWI.

UKIMWI husababishwa na nini?

UKIMWI unasababishwa na virusi aina ya HIV.

Virusi hawa hushambulia seli mbalimbali za mwili ikiwemo seli nyeupe za damu zijulikanazo kama CD4.

CD4 ni seli za mwili zinazohusika na kuupatia mwili ulinzi dhidi ya magonjwa mbalimbali.

Kushambuliwa kwa seli hizi kunadhoofisha ulinzi wa mwili dhidi ya magonjwa na kupelekea ulinzi au mwili kupungua au kudhoofu.

Kupungua kwa ulinzi au kinga ya mwili ndio hupelekea tatizo la Upungufu wa Kinga Mwilini (UKIMWI).

Jinsi gani virusi vya UKIMWI husambaa?

Virusi vya UKIMWI(HIV) vinasambaa kwa njia yeyote itakayopelekea majimaji au damu ya mtu mwenye virusi vya HIV itagusana na damu au majimaji ya mtu asiye na virusi hawa.

Njia kuu ambayo virusi hawa husambaa ni kupitia ngono zembe (kujamiana bila kutumia kinga).

Hatari ya kupata virusi vya UKIMWI huongezeka zaidi kwa watu ambao hujihusisha na mapenzi ya jinsia moja(mashoga), vilevile wanawake ambao huingiliwa kinyume na maumbile(Anal sex).

Njia nyinginezo ambazo zinaweza kusababisha virusi hawa kusambaa au kuambukizwa ni;

• Kuwekewa damu yenye virusi, hata hivyo sababu hii kwa sasa ni nadra sana kutokana na maendeleo ya sayansi na teknolojia ya uchunguzi wa damu katika maabara za damu.
• Kuchangia vitu vyenye ncha kali, Mfano sindano na wembe.
• Kutoka kwa mama kwenda kwa mtoto hasa wakati wa kujifungua, njia hii pia ni nadra sana kwa sasa hivi ikiwa mama mjamzito atawahi kuhudhuria kliniki.
• Wakati wa kunyonyesha, ikiwa mama anayenyonyesha atakuwa ni muathirika basi uwezekano wa kumuambukiza mtoto wake ni mkubwa.

Je ni kweli unaweza kuwa na HIV na usipate UKIMWI?

Ndio, unaweza kuwa na HIV na usipate UKIMWI kwa sababu HIV ni virusi, na UKIMWI ni matokeo ya uharibifu unaoweza kufanywa na virusi vya UKIMWI.

Ikiwa utazingatia miongozo bora ya jinsi ya kuishi na virusi hawa wa HIV, basi virusi hawa hawataweza kufanya uharibifu kwa kiasi cha kusababisha UKIMWI

Dalili za UKIMWI huonekana baada ya muda gani?

Dalili kuu huanza kujitokeza pale kiwango kikubwa cha seli za CD4 kimeathiriwa.

Muda wa ambao dalili za UKIMWI zinaweza kuanza kuonekana ni kati ya miaka 2 hadi 25, au zaidi. Itategemea ni kwa namna gani umewapa nafasi virusi hawa wa HIV kufanya uharibifu mwilini mwako.

Tunapozungumzia kuwapa nafasi virusi hawa ni kutozingatia kanuni na miongozo bora ya kuishi na virusi wa HIV, ikiwa ni pamoja na kuchelewa kufahamu kama tayari unaishi na virusi hawa.

Je, UKIMWI una dawa?

Mpaka sasa hakuna dawa wala chanjo ya kutibu na kuzuia virusi wa HIV na UKIMWI.

Kwa sasa dawa zinazopatikana ni dawa za kufubaza makalI ya virusi vya UKIMWI, Anti-Retroviral Drugs (ARV). Dawa hizi zinapunguza kasi ya virusi wa HIV kuangamiza seli za CD4.

Ni wakati gani sahihi wa kuanza kutumia dawa za UKIMWI(ARV)?

Wakati wowote utakapogundulika na virusi wa HIV unashauriwa kuanza kutumia ARV mara moja.

Utafiti unaonyesha jinsi utakavyowahi kuanza kutumia dawa za ARV ndivyo utavyoishi muda mrefu bila kupata UKIMWI, pengine ukaufikia hata umri wa kawaida wa kuishi.

Dalili za awali za UKIMWI

Ili mtu kupata UKIMWI, kuna hatua kuu 3 ambazo anapitia, katika kila hatua kuna dalili ambazo hujitokeza.

Hatua hizo ni kama Ifuatavyo:

Hatua ya kwanza (Kipindi cha maambukizi ya HIV)

Hatua hii ni ya mwanzo na hutokea katika kipindi cha wiki 2 hadi 4 baada ya maambukizi. Katika hatua hii virusi wa HIV huzaliana na kushambulia CD4 kwa kasi kubwa.

Baadhi ya watu huweza kuonyesha dalili zifuatazo;

• Mapunye katika ngozi
• Mafua
• Homa
• Kutokwa jasho wakati wa usiku
• Vidonda mdomoni
• Kupungua uzito ghafla
• Kuharisha
• Vidonda na michubuko mdomoni
• Homa za vipindi
• Kuvimba kwa tonsili
• Uchovu na mwili kuishiwa nguvu
• Maumivu ya kichwa na mwili.

Hatua ya pili (kipindi kisicho na dalili)

Katika hatua hii kasi ya kuzaliana ya virusi wa HIV hupungua kwa kiasi kikubwa.